Detaljer

Vegna Corona støðuna í Føroyum í dag, so verða allir dystir í lands- og steypakappingunum, sum skulu spælast til og við hósdagin 10.juni 2021, útsettir.

Detaljer

 
AB skipar aftur fyri online bingo sunnudagin 30. Mai kl. 16! og tú kanst vera við til at stuðla Argja Bóltfelag, við at spæla við á Facebook. Eisini verða lutaseðlar trektir ímillum spølini.
 
Kostnaður:
 
Bingoplátur:
1 pláta við 6 spølum kostar 60 kr.
2 plátur við 6 spølum hvør kosta 100 kr.
 
Lutaseðlar:
Hvør lutaseðil kostar 10. kr.
 
Soleiðis gert tú:
 
Tú sendir boð til Argja Bóltfelag á Facebook og viðmerkir hvussu nógvar plátur og lutaseðlar tú ynskir at keypa. Síðani flytir tú peningin á Konto nr.: 6460-156.536.4 og viðmerkir títt navn.
Vit skráseta títt navn og nr. á plátu, og senda tær plátur og lutaseðlar talgilt.
 
Seinasta freist at keypa er sunnudagin 30. Mai kl. 13:00
Detaljer


2. deild menn: B68 🆚 AB 3️⃣-3️⃣
 
Okkara næstbesta manslið spældu leygardagin 22. mai á Svangaskarði ímóti B68.
 
Í fyrra hálvleiki var ikki nógv at skriva heim um. Liðini fóru til hálvleiks á jøvnum, 0-0.
 
Men helt áskoðarin á Svangaskarði í dag, at fyrri hálvleikur var keðiligur at hyggja eftir, so kann viðkomandi ikki hava hildið tað sama eftir seinna hálvleik, har tað var sonn málveitsla.
 
Eftir 71 minuttir var líkt til, at vit skuldu heimaftur ígjøgnum Eysturoyartunnilin við ongum, tí upp á 26 minuttir í seinna hálvleiki leggur B68 seg á odda 3-0.
 
So hildu tey flestu, at nú var liðugt, og at stigini fóru at verða verandi á Toftum.
 
Men soleiðis skuldi ikki verða.
 
Í Champions League-finaluni í Istanbul í 2005 hevði Liverpool seks gandakendar minuttir, har Liverpool vendi 0-3 til 3-3 ímóti AC Milan. Okkara næstbestu royndu á bestan hátt at gera Liverpool kynstrið eftir, hóast tað tók okkum eitt sindur longri, 13 minuttir, at venda 0-3 til 3-3.
 
Fyrst minkar Hanus Ólavsson um munin til 3-1 eftir 74 minuttir. Hendan støðan heldur sær til fimm minuttir eru eftir av vanligu leiktíðini, tá eldhugaði Liverpool-fjepparin, Martin Balle, setir sær fyri, at nú skuldu vit skapa okkara egna Istanbul. Fyrst minkar Martin um munin til 3-2 við máli úr stuttari fjarstøðu, og tveir minuttir seinni verður Martin spældur leysur og javnar til 3-3. Tá var frøðin sum vera man stór á okkara monnum.
 
Javnleikur, 3-3, gjørdist endaliga úrslitið. Tað einasta, sum manglaði fyri at fullkomiliga eftirlíkna undrinum úr Istanbul var, at vit fingu eina brotssparkskapping, har dagsins vikarur í málinum, Brandur Jákupsson, tryggjaði okkum sigurin, men brotssparkskappingar eru ikki ein partur av landskappingardystum.
 
Sera væl komið aftur av okkara monnum, sum við eina stiginum framvegis eru nummar 6 í 2. deild - nú við níggju stigum.
 
Vit loyva okkum at ynskja okkara monnum til lukku við eina stiginum og fegnast um góða hugburðin! ❤️💙
Detaljer

Saman við 07 Vestur, B68, HB, AB og Skála, skipar Fótbóltssamband Føroya fyri tilsamans fimm fótbóltsskúlum í summar, sum verða í juni og juli mánað. 

Sum so nógv annað, so var korona orsøkin til, at árligu fótbóltsskúlarnir hjá FSF blivu avlýstir í fjør. Men nú er greitt, at fótbóltsskúlarnir, sum vit kenna teir, verða aftur í ár.

Tilsamans fimm fótbóltsskúlar verða á skránni í juni og juli mánað. Tað er FSF, saman við 07 Vestur, B68, HB, AB og Skála, sum er fyriskipari av fótbóltsskúlunum.

Fótbóltsskúlin verður hildin yvir tveir dagar og er ætlaður gentum og dreingjum í aldurinum 7 til 15 ár (tvs. børn fødd í 2006 til og við 2014). Øll sum luttaka fáa – afturat góðari fótbóltsvenjing – eisini mat, frukt, bólt, t-shirt og luttøkubræv.

Endamálið við fótbóltsskúlunum hjá FSF er at kveikja og styrkja fótbóltsáhugan hjá børnum, bæði royndum og óroyndum, og at fótbóltsligu førleikarnir verða mentir.

Men tað er eisini av stórum týdningi, at børnini fáa eitt gott upplivilsi, bæði fótbóltsliga og sosialt, og at børnini á ungum aldri fáa alsk fyri heimsins besta spæli, sum fótbóltur er.

Kostnaðurin fyri at luttaka á hvørjum einstøkum fótbóltsskúla er 400 kr. Men tað ræður um at gera skjótt av. Kostnaðurin hækkar nevniliga til 500 kr., tríggjar vikur áðrenn skúlin byrjar.

Tilmelding fer fram í Nethandilinum á heimasíðuni hjá FSF.

Fótbóltsskúlarnir 2021

Fríggjadagin 9. juli og leygardagin 10. juli
Inni í Vika á Argjum (AB)

Fríggjadagin 18. juni og leygardagin 19. juni
á Dungasandi í Sørvági (07 Vestur)

Leygardagin 19. juni og sunnudagin 20. juni
á Svangaskarði á Toftum (B68)

Mánadagin 28. juni og týsdagin 29. juni
á Ovara vølli og á Tórsvølli (HB)

Hósdagin 22. juli og fríggjadagin 23. juli
undir Mýruhjalla á Skála (Skála)

Detaljer
  1. U17 vann í Trongisvági
  2. Tóku ikki av møguleikanum

Side 10 ud af 38