Tað er gott at vera væl mannaður við málmonnum. AB hevur styrkt um málmanshópin í eldru deildunum, soleiðis at tað nú eru 3 málmenn til reiðar. Vit hava í eina tíð bert havt 2 málmenn, og tað er ov lítið, tá tað altíð kann henda, at onkur teirra verður skaddur ella ikki fær spælt.
Sáttmáli er gjørdur við 17 ára gamla Sverra Petersen, sum er uppvaksin í AB og hevur verið málmaður seinastu árini hjá U21 og 2. deild. Nú hann hevur gjørt sáttmála við AB, er hann vorðin partur av hópinum í Betrideildini eisini. Sverri hevur góð evnir sum málmaður, og spennandi verður at síggja hann mennast í málinum, nú hann nærkast vaksnamanna aldur.
Somuleiðis hevur AB gjørt sáttmála við 20 ára gamla danan Christopher Nødskov Frydelund Kristensen. Christopher hevur seinastu árini verið málmaður í 2. división á seniorliðnum hjá Boldklubben Søllerød Vedbæk, har hann annars eisini er uppvaksin og hevur spælt meginpartin av sínum ungdómsárum við góðum úrslitum.
Afturat hesum báðum málmonnunum hava vit okkara legendariska Heðin Stenberg. Sostatt skuldi málmanshópurin verið væl brynjaður til komandi kappingarár hjá Betrideildini, 2. deild og U21.
(Mynd: Sverri Petersen (vm) og Christopher N. F. Kristensen).